Seçenov Universitetinin Bakı Filialı və Azərbaycan Respunlikası Milli Onkologiya Mərkəzi birgə təşkilatçılığı ilə mövzusunda beynəlxalq elmi-praktik konfrans keçirilib

Seçenov Universitetinin Bakı filialı tərəfindən təşkil olunan “Qalxanabənzər vəzi xərçəngi və metabolik xəstəliklər: müasir yanaşma” mövzusunda beynəlxalq elmi-praktik konfrans filialının 10 illik yubileyinə həsr olunub və qalxanabənzər vəzi xəstəliklərinin müasir diaqnostika, müalicə üsulları üzrə elmi-praktik biliklərin paylaşılmasını, habelə bu sahədə mütəxəssislərin bilik və bacarıqlarının artırılmasını hədəfləyir.

Konfransda ümumi cərrahlar, onkoloqlar, endokrinoloqlar, radioloqlar və terapevtlər iştirak ediblər.

Tədbiri giriş sözü ilə açan Seçenov Universitetinin Bakı Filialının rektoru, Səhiyyə Nazirliyi Milli Onkologiya Mərkəzinin baş boyun şişləri şöbəsinin aparıcı cərrah-onkoloqu, professor Əziz Əliyev son illərdə Seçenov Universitetinin Bakı filialı böyük inkişaf yolu keçdiyini diqqətə çatdırıb.

“Bizim universitet 2015-ci ildə Azərbaycan Respublikasının Prezidenti cənab İlham Əliyevin sərəncamı və birinci xanım, Seçenov Universitetinin fəxri professoru Mehriban xanım Əliyevanın təşəbbüsü ilə yaradılıb.

Universitetimiz ən müasir avadanlıqlarla təchiz olunub, 30-dan çox xəstəxana ilə əməkdaşlıq edir. Tələbələrimiz bu xəstəxanalarda təlim keçirlər. Universitetimizdə 720 tələbə və 109 rezident oxuyur, professor-müəllim heyəti Moskvadan gəlir”,- deyə rektor bildirib.

Onun sözlərinə görə, Tədris-Simulyasiya Mərkəzində Seçenov və Azərbaycan Tibb universitetinin tələbələri üçün praktik vərdişlərin tədrisi və akkreditasiya aparılır.

“Seçenov Universitetinin Tədris-Simulyasiya Mərkəzi Avropa Simulyasiya Tədrisi sertifikatı alıb və biz fəxr edirik ki, keçən ildən Qarabağ İqtisadi Zonasında əhaliyə və yerli həkimlərə təlimlər keçiririk”, - deyə Əziz Əliyev əlavə edib.

Professor həmçinin deyib: “14 may tarixində MDB iştirakçı dövlətlərin Dövlətlərarası Humanitar Əməkdaşlıq Fondu tərəfindən mənə Düşənbə şəhərində “Birlik Ulduzları” mükafatı təqdim olunub. Bu mükafat mənə “Elm və təhsil sahəsində misilsiz töhfə və nailiyyətlərə görə” verilib. Bu mükafata əlavə olaraq 2 milyon rubl məbləğində pul mükafatı da verildi. Zalda bütün MDB ölkələrinin nümayəndələri iştirak edirdi və mən xüsusilə vurğulamaq istəyirəm ki, məni orada çıxışa dəvət edəndə çıxışım zamanı bəyan etdim: bu mükafatı Qarabağın Dirçəlişi Fonduna yönəltmək qərarına gəlmişəm. Əlbəttə, bu, dövlətimizin gördüyü böyük işlərlə müqayisədə dənizdə bir damladır, lakin bu mənim üçün böyük bir şərəfdir. Mən bu sözləri deyərkən Vətənimlə, rəhbərimlə – Azərbaycan Respublikasının Prezidenti İlham Əliyevlə qürur duyuram. Çünki bu sözləri səsləndirmək imkanını bizə məhz onun rəhbərliyi altında qəhrəman ordumuzun Qarabağ bölgəsini azad etməsi təmin etmişdir. Bu gün biz əminliklə deyə bilərik: Qarabağ Azərbaycandır! Bu bölgə sürətlə yenidən dirçəlir. Məhz Azərbaycan Respublikasının Prezidenti İlham Əliyev və birinci vitse-prezident Mehriban xanım Əliyeva kimi rəhbərlərimiz sayəsində biz öz Vətənimizlə qürur duyuruq – necə inkişaf edib, necə müasir bir dövlətə çevrilib Azərbaycan. Ali Baş Komandanımızın rəhbərliyi və qəhrəman ordumuzun rəşadəti nəticəsində biz torpaqlarımızı geri qaytardıq və bu gün başıuca, fəxrlə gəzirik.”

Növbəti çıxışda Mayami Xərçəng Araşdırma Mərkəzinin qurucu prezidenti və baş icraçı direktoru professoru Seza Ali Güleç qalxanabənzər vəzi xərçənginin müalicəsi tarixinə nəzər saldı. O, bir neçə il bundan öncə bu xəstəlik haqqında əhəmiyyətli bir araşdırmaya toxunaraq bütün tiroid xərçənginin yüksək xüsusiyyətlərə malik olduğunu bildirdi. Professor risk altında olanların müalicəsinin əvvəllər düşündüyümüz qədər asan olmadığını vurğuladı.

Tiroid xərçənginin müasir cərrahi müalicəsi haqqında prezentasiya ilə çıxış edən professor Əziz Əliyev əməliyyatın əsas məqsədinin ətrafdakı strukturlara minimal ziyan vurma riski ilə şişin tamamilə çıxarılması olduğunu diqqətə çatdırdı. O, Azərbaycanda ən çox rast gəlinən xərçəng xəstəlikləri kişilər arasında ağciyər, mədə, kolon xərçəngləri, qadınlar arasında isə süd vəzi, kolon və qalxanabənzər vəzi xərçəngləri olduğunu qeyd etdi.

İ.M.Seçenov adına Birinci Moskva Dövlət Tibb Universitetinin Endokrinologiya Klinikasının direktoru professor Valentin Fadeyev düyünlü zobun ilkin diaqnostika konsepsiyasında dəyişikliklər haqqında prezentasiya ilə çıxış etdi.

Daha sonra Milli Onkologiya Mərkəzi Nüvə təbabəti və radionuklid terapiya bölməsinin rəhbəri tibb üzrə fəlsəfə doktoru Fuad Novruzov “Yod neqativ metastatik tiroid xərçəngində diğər radioliqand müalicə taktikaları”, Berlin Sağlamlıq İnstitutunda bioinformatik Dr. Burulca Uluvar “Radioaktiv yod teranostikasının molekulyar əsasları”,  İsveç Karolinska İnstitutunun və Universitet Xəstəxanasının kardiologiya üzrə professoru professor Françesko Kosentino “Diabet və ürək-damar xəstəlikləri: kardioloqun baxış bucağından problemlər və çətinliklər” mövzularında çıxış etdilər.

Tədbirdə metabolik xəstəliklər və tiroid şişlərinin meydana gəlməsi arasındakı əlaqəni nəzərdən keçirərək xəstələrin müalicəsinə vahid bir yanaşma tətbiq olunması ətrafında müzakirələr aparıldı.

Konfrans iştirakçıları maraqlandıran bir sıra suallar cavablandırıldı.